Чăваш Республикин информаци политикин тата массăллă коммуникацисен министерстви республикăри массăллă информаци хатĕрĕсем хушшинче йĕркеленĕ социаллă пĕлтерĕшлĕ проектсен конкурсĕн итогĕсене пĕтĕмлетнĕ.

"Елчĕк ен" хаçат редакцийĕ тăратнă "Черкки пĕчĕк те инкекĕ пысăк" проект конкурсра çĕнтерỹçĕсенчен пĕри пулса тăнă. Министерство пуш - раштав уйăхĕсенче проекта пурнăçлама хаçат редакцине 200 пин тенкĕ уйăрать. Çак тапхăрта хаçатра "Черкки пĕчĕк те инкекĕ пысăк" ятарлă кăларăм тухса тăрĕ. Унта эрех-сăра сиенĕ, вăл мĕнле инкек патне илсе пыни, эрех-сăрапа суту-илỹ тăвассинчи саккуна пăснисем, сывă пурнăç йĕркине тытса пынин усси çинчен тĕрлĕ жанрпа çырнă материалсем, врач канашĕсем пичетленĕç.

Хаçат редакцийĕ социаллă пĕлтерĕшлĕ проектсен конкурсĕнче юлашки тăватă çулта виçĕ хутчен çĕнтерни те (пĕр çулĕнче ăна йĕркелемен) лайăх пулăм.