Ыррине курса вĕренер

Аслă Елчĕкри Г.Н.Волков ячĕллĕ пĕтĕмĕшле пĕлỹ паракан вăтам шкулта пуçламăш классене вĕрентекенсен пĕрлешĕвĕн ĕçлĕ ларăвĕ иртнĕ. Тăван çĕр-шыв историне, тăван халăх историне пĕлни малашлăх аталанăвĕнче пысăк витĕм кỹрет. Д.А.МЕДВЕДЕВ. 2012 çул Раççей историйĕн çулталăкĕ пулнă май тата ачасене патриотла воспитани парас уйăхлăх пулнине тĕпе хурса класс тулашĕнчи мероприятисене курса тишкертĕмĕр. Ăна тăван ялăн ĕçпе тата пултарулăхпа республикăра, çĕр-шывра, тĕнчипе палăрнă ывăл-хĕрĕсене халалланă. Пуçламăш классенче вĕрентекенсем Н.Хушкина, Т.Ласточкина, Л.Волкова, В.Питакова хатĕрленĕ материалсем тăрăх кĕçĕн классенче вĕренекенсем Аслă Елчĕкĕн паллă çыннисем çинчен каласа пачĕç, сăвăсем вуларĕç, юрă-ташăпа савăнтарчĕç. Уйрăмах тăваттăмĕшсем Г.Н.Волковăн "Асанне калавĕсем" кĕнекинчи калавсене кăмăла каймалла сăнарласа пачĕç. Кĕçĕн классенче вĕренекенсем те юрă-ташăра питĕ ăста пулчĕç. Аслă Елчĕк - пысăк ял. Çак ялта çуралса ỹснĕ, кунта пĕлỹ пухнă, кайран ĕçпе тата пултарулăхпа чапа тухнă çынсем те йышлă: Г.Н.Волков академик, А.Н.Волков, З.Н.Волков - медицина наукисен докторĕсем, Н.С.Карлин - композитор, Л.А.Шакова - Узбекистан тава тивĕçлĕ артистки, В.И.Адюков - сцена ăсти, И.Г.Уркин - ирĕклĕ майпа кĕрешес енĕпе СССР спорт мастерĕ, В.И.Агеев - ỹнерçĕ, В.Д.Немцев - скульптор тата ыттисем те. Эпир вĕсемпе тивĕçлипе мухтанатпăр, мăнаçланатпăр. Кăçал Аслă Елчĕксемшĕн питĕ паллă çул пулса асра юлĕ. Пирĕн шкула Г.Н.Волков ятне панипе эпир питĕ савăнатпăр. Паллă ăсчах çуралнăранпа кăçал 85 çул çитет. Аслă Елчĕкре çĕртме уйăхĕнче Г.Н.Волкова асăнса палăк лартма йышăннă. Çак ырă ĕçе пуçараканĕсем Чăваш Республикинчи учитель-ветерансен канашĕн Президиумĕ, Г.Н.Волков ячĕллĕ наукăпа тĕпчев институчĕн этнопедагогика уйрăмĕ тата И.Я.Яковлев ячĕллĕ Чăваш патшалăх педагогика университечĕ пулни çинчен шкул директорĕ Н.Ф.Малышкин каласа пачĕ. Чăвашсен ырă йăлипе çак палăка нимелле тума палăртнă. Ку енĕпе малтанхи утăмсем тунă та. Пирĕн шкулта, ача садĕнче ĕçлекенсем çак пуçарăва ырласа пĕр кунхи ĕç укçине хывнă. Палăка Аслă Елчĕкре çуралса ỹснĕ В.Д.Немцев скульптор ăсталĕ. Ларăва пухăннисем шкул музейĕпе, вулавăшпа, пуçламăш класра вĕренекенсен ал ĕç выставкипе паллашрĕç. Мероприятие пысăк хак пачĕç. Тăван ялти, районти ырă кăмăллă çынсем çак пархатарлă ĕçе тума хутшăнасса шанас килет. "Ырă ырăпа таврăнĕ", - тенĕ ватăсем.

Первоисточник: "Елчĕк Ен"

Опубликовано

25 февраля 2012
00:00

Распечатать

Ыррине курса в&#277;ренер

Ыррине курса вĕренер