Çĕнĕ Эйпеçре парк çитĕнĕ

Çĕнĕ Эйпеçре пурăнакансем ака уйăхĕн 28-мĕшĕнче ирхине 7 сехетрех пĕрин хыççăн тепри ял варрине пуçтарăнчĕç, кам кĕрепле, кам кĕреçе илнĕ. Ирхи ял шăплăхне трактор кĕрлевĕ хупларĕ, культура çурчĕ умĕнче хаваслă кĕвĕ янăрарĕ. Ял çыннисем уяври пек ир-ирех урама хăпса тухнин сăлтавне уçăмлатса çакна пĕлтеретпĕр: Çĕнĕ Эйпеç ялĕ пуçланса кайнăранпа кăçал 145 çул çитет. Унсăр пуçне, çитес кунсенчех Аслă Çĕнтерỹ уявĕ те. Çак паллă кунсене асра тытса ял халăхĕпе канашласа эпир йывăçсен паркне çитĕнтерме палăртрăмăр. Ял варринчи çавра кỹлĕпе культура çурчĕ тата вăрçăра вилнисене асăнса лартнă палăк хушшинче çитĕнĕ вăл. Лаш Таяпа ял тăрăхĕн пуçлăхĕ Владимир Воробьев хамăр тăрăхри Рустем Багаутдинов лесничипе лартмалли йывăçсене пĕр кун маларах яла илсе çитерчĕç. 0,25 гектар çинче çитĕнтерме палăртакан парка йĕри-тавра тытса çавăрмалăх сеткăсемпе тимĕр юпасене тата ытти материалсене маларах хатĕрлесе хума ĕлкĕрнĕччĕ ĕнтĕ. Вĕренесемпе тирексене, йăмрасене хĕллехи пушă вăхăтра касса, тасатса хунăччĕ. 4 кун каялла Николай Герасимов ирхине ирех хăйĕн килти тракторĕпе хĕлле илсе тухма май килмен вăрăм пĕренесене çырмаран сĕтĕрсе тухса вĕсене ял выльăхĕсене каçса çỹремелли пысăк кĕпере юсанă çĕре илсе кайса пушатрĕ. Ял хавалĕ пулсан ĕç кал-кал пырать. Ĕçре хавхалантарса пыракансем вара нумаййăн. Алексей Дружинин 80 çула çывхарса пынине пăхмасăр яла тирпей-илем кĕртессипе хастар ĕçлет. Алексей Ивановича ял-йыш хисепленине пĕлтерсе хальхинче те пулас паркри пĕрремĕш йывăçа лартма ирĕк пачĕç. Версалий Васильев, Владимир Канжелев, Валерий Федоров, Геннадий Игнатьев, Валерий Васильев, Геннадий Дружинин, Лев Марков, Петр Дружинин, Николай Петров та тăрăшса ĕçлерĕç. Николай Герасимов мотопăчкăпа йывăр йывăçсене тата тункатасене касса пыма ĕлкĕрчĕ. Хĕрарăмсем вара ĕçлеме хистекенсем пулчĕç тесен те йăнăш мар. Надежда Журавлева, Марина Петрова, Надежда Петрова, культура, медицина ĕçченĕсем _ Ирина Воробьева, Любовь Мустаева, Тамара Матвеева, Лидия Ксенофонтова лартнă йывăçсене шыв сапса тăчĕç. Тĕрĕссипе, пирĕн ялта кăçал çĕр ăшăнма пуçлансанах йывăç лартма пикеннĕ. Чи малтан Арманкасси урамĕнче, кас вĕçĕнче пурăнакансем, асфальтлă çул хĕррине вуншар тĕм-йывăç лартрĕç. Хунавсене Патăрьелĕнчи питомникран Александр Осипов предприниматель хăйĕн укçи-тенкипе кỹрсе килчĕ. Çак пархатарлă ĕçе пурнăçлама Владимир Воробьев та хастар хутшăнчĕ, унăн хăйĕн трактор пур. Фермер хуçалăхĕн ертỹçи Николай Бикулов та тав сăмахне тивĕçлĕ. Ун патне кирек мĕнле ыйтупа пырсан та вăл ăна ял çыннисене майлă татса пама тăрăшать. Çынсем пĕр-пĕрне ăнланни, пулăшма тăрăшни малашне тата пысăкрах ĕçсем тума хавхалантарса пырать.

Первоисточник: "Елчĕк Ен"

Опубликовано

30 апреля 2009
00:00

Распечатать

&#199;&#277;н&#277; Эйпе&#231;ре парк &#231;ит&#277;н&#277;

Çĕнĕ Эйпеçре парк çитĕнĕ