Çĕнелсе хитреленнĕ, илемленнĕ Елчĕкри культурăпа кану центрне районти ветерансемпе пенсионерсем черетлĕ пленума пуçтарăнчĕç. Çỹçĕсем кăвакарнă, пилĕкĕсем авăннă, урисем çирĕпех утаймаççĕ пулсан та ватăсем кунта килме хал çитернĕ. Епле-ха унсăрăн: чĕннĕ çĕре яланах хапăл вĕсем. Пĕр-пĕрне курса калаçни темрен хаклă, тата ялсенчи сумлă çынсемпе яланах район пуçлăхĕ Николай Миллин, ытти ертỹçĕсем тĕл пулаççĕ, ветерансен кирек мĕнле ыйтăвĕ çине те хуравлаççĕ. Районти ветерансен совечĕн ертỹçи С.Терентьева отчет туса панă май çакă паллă пулчĕ: районта ветерансен пуçламăш организацийĕсем 37. Вĕсене ĕçре пиçĕхсе пенсие тухнă ватăсем, хисеплĕ ветерансем ертсе пыраççĕ. Районта 7900 пенсионер, вăл шутран Аттелĕхĕн Аслă вăрçин участникĕсем 107, тăлăх салтак арăмĕсем 22, тыл ĕçченĕсем 1605, ĕç ветеранĕсем 4929, инвалидсем 1860. Пĕлтĕр ветерансем тĕрлĕ мероприяти ирттернĕ. Кăçал та паллă датăсене пĕрле пухăнса уявлама пулчĕç вĕсем. Аслă ăрури çынсем çамрăксене патриотла воспитани парассине тĕп вырăна хураççĕ. Вĕсен калаçăвне итлесе ларатăн та, чунĕсемпе епле çамрăккине туятăн, пĕринчен тепри малашлăхшăн тăрăшать. Елчĕкри К.Леонтьева, Таяпа Энтринчи О.Миронова, Аслă Елчĕкри Л.Горшкова (районти пенсионерсен пĕрлĕхĕн ертỹçи), Çĕнĕ Эйпеçри Г.Туманов, Патреккелти И.Петров тата ыттисем те ялшăн хыпса çунаççĕ. Вĕсен ырă ĕçĕсем пирки район хаçачĕ çутатсах тăрать. Ветерансен пленумĕнче тухса калаçакансем йышлăн пулчĕç. РФ Пенси фончĕн Елчĕк районĕнчи уйрăмĕн ертỹçи З.Яковлева, районти тĕп аптека ертỹçи Р.Молодова, халăха социаллă пулăшу паракан центрти уйрăм заведующийĕ Т.Новикова ыйтусем çине хуравларĕç, ветерансене социаллă çăмăллăхсем парас енĕпе йышăннă федераци саккунĕсем пирки чарăнса тăчĕç. Район пуçлăхĕ Н.Миллин ветерансене вырăнти лару-тăрупа, кулленхи çивĕч ыйтусемпе паллаштарчĕ, ватăсен ыйтăвĕсем çине харавларĕ, ырă та пархатарлă ĕçшĕн вĕсене тав турĕ. Юлашкинчен пленума хутшăннисем Елчĕкри культура ĕçченĕсен пултарулăхĕпе паллашрĕç. Калас пулать, Аслă Елчĕкрен килнĕ пенсионер-юрăçсем _ Н.Катина, Е.Ахмерова, К.Волкова, Л.Васильева концерта тата илем кĕртрĕç.

Первоисточник: "Елчĕк Ен"