Иртнĕ вĕренÿ çулĕнчи спартакиада итогĕсемпе Елчĕксем пĕтĕмĕшле 6-мĕш, яллă районсен ушкăнĕнче 3-мĕш вырăн йышăннăччĕ. Пирĕн районти 8-10-мĕш классенче вĕренекенсем кăçал та пĕлтĕрхинчен начар мар ăмăртасса шанать ДЮСШ завучĕ Р.Григорьев. Анчах спортăн кашни тĕсĕпе хĕрÿ кĕрешÿ пырать. Çакна дзюдо енĕпе командăсем хушшинче иртнĕ ăмăрту аван кăтартса панă. Елчĕксем Шупашкарти Ленин районĕнчи дзюдо-истсемпе тĕл пулнă. Пирĕн команда 4:5 шутпа хула ачисене выляса янă. Çапах та хăйсен виçисенче Кармалти Ф.Леонтьев, П.Убасев, Кĕçĕн Таяпари А.Морозов, Елчĕкри Н.Соколов çĕнтерме пултарнă.