Чи малтанах урамсенче, харпăр хăй пурăнакан çуртсем умĕнче йĕрке туса хурассипе тимлемелле. Халĕ, пытарма кирлĕ мар, чылайăшĕ урама, транспорт иртсе çỹрекен вырăна, темĕн те пĕр кăларса лартнă. Хăшĕ-пĕри автомото-транспорта кил умĕнче тытать. Кунтах çĕмрĕк техника тавралăх илемне пăсса ларнине курма пулать. Çул хĕррине е пỹрт-çурт умне автомототранспорт лартса хăваракансем хăйсем çул çỹремелли правилăсене пăснине темшĕн-çке шута илесшĕн мар.

     Акă, çул çỹремелли правилăсен 1.5-мĕш пункчĕпе килĕшỹллĕн, çулпа çỹрекенсен ыттисемшĕн хăрушлăх кăларса тăратмалла мар. Çавăн пекех çула сиен кỹме тата варалама, çул-йĕр паллисене, техникăлла ытти хатĕрсене харпăр хăй тĕллĕн вырнаçтарма, илсе пăрахма, картласа лартма юрамасть. Транспорта иртсе çỹреме чăрмантаракан япаласене çул çинче хăвармалла мар. Енчен те çавăн пек лару-тăру тухса тăчĕ пулсан, ăна пĕтерме мера йышăнмалла, çапла тума май çук-тăр, çул çинчи хăрушлăх пирки автомототранспорт водителĕсене пĕлтерессине йĕркелемелле тата милицие евитлемелле.

     Çапла, çул çỹремелли правилăсен 1.5-мĕш пунктне пăснăшăн граждансене, должноçри, юридици сăпатĕнчи çынсене РФ Административлă право кодексĕн 12.33-мĕш статйипе килĕшỹллĕн явап тыттараççĕ - граждансене чи пĕчĕк ĕç укçин 3-5 виçи, должноçри çынсене 5-10 виçи, юридици сăпатĕнчи çынсене 50-100 виçи таран штраф хураççĕ.

     Автомототранспорта иртсе çỹреме, çавăн пекех коммуналлă тата çул-йĕр службисене юр хырса тасатма чăрмантаракан япаласене çулсем хĕррине лартса хăваракансене тупса палăртассипе ятарлă рейдсене тăтăшах ирттерĕпĕр.