"Труд" ял хуçалăх производство кооперативĕн Тĕмерти ĕне фермин коллективĕ хальхи вăхăтра кашни ĕнерен талăкра 11 килограмм сĕт суса илет. Ку кăтарту иртнĕ çулхинчен пысăкрах. Фермăра 7 доярка. Вĕсем пĕр-пĕринпе ăмăртса, килĕштерсе вăй хураççĕ. Ăмăрту çĕнтерỹçисем - Людмила Григорьевăпа Валентина Козлова. Вĕсем хăйсене çирĕплетсе панă ĕнесенчен куллен 12-13-шер килограмм сĕт суса илеççĕ.

     Фермăсене хĕле хатĕрлесе М.Козлов ертсе пыракан бригада ĕне, пăру витисен маччисене юсарĕ, урайĕсене çĕнетрĕ. Пиллĕкĕн вăй хураççĕ юсав бригадинче. Пĕчĕк юсав ĕçĕсем татах та пур-ха. Вĕсене çывăх кунсенче пурнăçласшăн.