Çак кунсенче шăпах хĕрỹ ĕç вăхăчĕ пулнине кура-ши, шел пулин те, культура çурчĕсенче халăх йышлах пулаймарĕ. Апла пулин те залра ларакансен кăмăллă сăн-пичĕ, тăвăллăн алă çупни, пĕлекен юрăсене пĕрле юрлани, çамрăксем илĕртỹллĕ кĕвĕпе кăмăллăн ташлани юрăçсене чунри пĕтĕм илемлĕхе куракансене парнелеме хистерĕ. "Эсир пирĕн пата килсех çỹрĕр-ха", "Концерт питĕ чаплă пулчĕ", "Шупашкарти артистсенчен те ирттеретĕр", - тенĕ сăмахсене итлеме питĕ кăмăллă.

     Мĕн тунипе кăна лăпланса ларасшăн мар хĕрỹ чĕреллĕ культура работникĕсем, малашне тата та нумайрах, май килсессĕн районти кашни ялах çитсе халăха илемлĕ юрă-ташăпа савăнтарма, ĕçрен каннă вăхăтра хаваслă кăмăл-туйăм парнелеме ĕмĕтленеççĕ.

     Ял халăхне "сенкер экран" умĕнче пусăрăнса лариччен культура çурчĕсене тухса савăнма, артистсемпе пĕрле асамлăх тĕнчине путма чĕнетпĕр. Килĕр, курăр, савăнăр, килсе курсан ỹкĕнмĕр.