Фермăсенчи ĕнесене çуллахи лагере илсе тухас умĕнхи черетлĕ канашлăва районти ял хуçалăх предприятийĕсен зоотехникĕсемпе ветеринарĕсем, кĕтỹçĕсем хутшăннă. Хĕл тапхăрĕнчи кăтартусем, обществăлла выльăх-чĕрлĕхе çу тапхăрĕнче пăхас тĕлĕшĕпе умра тăракан тĕллевсем пирки ял хуçалăх управленийĕн тĕп зоотехникĕ В.Васильева, ĕнесене кỹпĕнесрен сыхласси, вĕсем кỹпĕнсен мĕнле сиплесси çинчен районти ветеринари станцийĕн терапевчĕ И.Макарова тĕплĕн ăнлантарса панă.

     Пĕрле пуçтарăннипе усă курса район администрацийĕн пуçлăхĕ Н.Миллин нумай çул тỹрĕ кăмăлпа ĕçленĕ кĕтỹçĕсене - Борис Миронова ("Сатурн"), Валерий Маслова ("Кушкă"), Николай Осипова ("Комбайн"), Владимир Дозорова ("Прогресс") район администрацийĕн Хисеп грамотисем парса чыс тунă.

     "Прогресс" хуçалăхри Владимир Дозоров доярпа "Комбайн" ял хуçалăх производство кооперативĕн тĕп зоотехникĕ Анатолий Николаев хăйсен ĕçĕ-хĕлĕпе паллаштарнă.

     Юлашкинчен çуллахи тапхăрта ĕне кĕтĕвĕ кĕтекен кĕтỹçĕсен ĕçлĕ ăмăртăвĕн условийĕсене çирĕплетнĕ.