Малти-малах. Çурхи уй-хир ĕçĕсене пуринчен те маларах пуçăннă "Комбайн", "Заря", "Сатурн", "Колос", "Свобода" хуçалăхсенче пĕрчĕллĕ тата пăрçа йышши культурăсене акассине вĕçленĕ. Асăннă хуçалăхсенчен тĕш тырра "Комбайн" хуçалăхра чи пысăк лаптăкра - 737 гектар çинче акса хăварнă. Борис Соловьев (виççĕмĕш бригада), Владимир Абрамов (пĕрремĕш бригада), Михаил Сусметов, Юрий Еремеев (иккĕмĕш бригада) механизаторсем кăтартуллă, тухăçлă ĕçлеме пĕлнипе палăрнă. Сухана 5 гектар лартнă, хĕрлĕ чĕкĕнтĕре 3 гектар, севок вăрлăхне (чернушка) 7 гектар çинче чи лайăх вăхăтра акса хăварнă. Пахча çимĕç лаптăкĕсенчи ытларах ĕçе Геннадий Фатламов механизатор пурнăçланă.

     Çурхи культурăсем кăçал "Заря" хуçалăхра 320 гектар, "Сатурн" хуçалăхра 453 гектар пулĕç. "Сатурнри" Владимир Крысов механизатор, Николай Митрофанов пулăшаканĕпе пĕрле, сменăри нормăна икĕ хут ытла пурнăçлама ĕлкĕрсе пынăран ĕç кал-кал пынă. Юрий Кадышев, Владимир Кукурузов, Николай Крысов, Геннадий Зайцев механизаторсем вара пĕрчĕллĕ культурăсене акма çĕр хатĕрлес ĕçре тимленĕ.

     "Колос" хуçалăхра кăçал 500 гектар тĕш тырă акса хăварнă. Александр Курчин çамрăк механизатор уйрăмах тухăçлă ĕçленине палăртма кăмăллă. Хăйне шанса панă çĕнĕ МТЗ-1221 йышши урапаллă трактора пĕр чăрмавсăр ĕçлеттернĕ вăл. Александр Павлов вара кĕске вăхăт хушшинче 23 гектар пахча çимĕç, 10 гектар çĕр улми акнă-лартнă. Акнă лаптăксене Владимир Петров пусăрăнтарнă.

     "Свобода" хуçалăхри 444 гектар çинчи тĕш тырра Юрий Ермаковпа Олег Печков механизаторсем хăйсен пулăшаканĕсемпе акса пĕтернĕ.