Чăваш Республикин Вĕрентỹ тата çамрăксен политикин министерстви пуçарăвĕпе ака уйăхĕн 12-мĕшĕнче, космонавтсен кунне халалласа, Шуршăлти культура çуртĕнче республикăри çамрăк космонавтсен пĕрремĕш слечĕ пулса иртнĕ. Пирĕн район чысне унта Тăрăмри пĕтĕмĕшле пĕлỹ паракан тĕп шкулти 12 çултан аслăрах 7 вĕренекен хỹтĕленĕ. Слетра 12 районти шкулсенчен пуçтарăннă çамрăк космонавтсен отрячĕсем тĕрлĕ секцисенче тупăшнă. Тăрăм шкулĕнче йĕркеленĕ çамрăк космонавтсен "Звездный" отрячĕ Шуршăлтан Г.Кузнецов сăввипе В.Захаров çырса кĕвĕленĕ "Улăп-паттăр" юрăпа, Н.Баймушкина хайланă "Кăйкăр" сăвăпа, слет эмблемине палăртакан В.Егоров ăсталанă ỹкерчĕкпе виçĕ номинацире те çĕнтерỹçĕ дипломĕсем илсе таврăннă. Пĕтĕмĕшле итогсемпе пирĕн район команди виççĕмĕш вырăна тивĕçнĕ.