Çур аки çывхарнă май хуçалăхсенче пахалăхлă вăрлăх хатĕрлесси, вĕсене ака стандарчĕн пĕрремĕш класне çитерессишĕн тăрăшасси тĕп вырăн йышăнать.

     Тыр-пул тухăçне ỹстерессинче малашлăх çĕнĕ сорт- сене ĕçе кĕртни пысăк пĕлтерĕшлĕ. Ку енĕпе "Прогресс", "Комбайн", "Свобода", "Заря", "Колос" хуçалăхсем уйрăмах тăрăшуллă.

     Çак кунсенче, сăмахран, "Прогресс", "Свобода" хуçалăхсем Çĕрпỹ районĕнчи наука-тĕпчев институтĕнчен пĕрер тонна пысăк репродукциллĕ "Привет" çурхи сĕлĕ вăрлăхĕ илсе килнĕ.

     "Комбайн" хуçалăх маларах асăннă институтранах çурхи туллăн икĕ сортне туянчĕ. "Московская -35", "Ирень" (3 тонна) сортлă пысăк элитăллă вăрлăхсем акни, наука кăтартнă тăрăх, гектар тухăçне палăрмаллах ỹстерет.

     "Колос" хуçалăх вара пахалăхлă çĕр улми тухăçне ỹстерес тĕллевпе "Удача" çĕр улми илсе килнĕ.

     "Заря" хуçалăх Çĕрпỹ районĕнчи "Колос" производство хуçалăхĕнчен пысăк репродукциллĕ 7,2 тонна çурхи урпа, 10 тонна çурхи тулă вăрлăхĕсене туянчĕ.

     Иртнĕ çул севок ỹстерсе япăх мар тупăш илнĕ "Яманчуринский" хуçалăх Канашри "Сортсемовощ" организацирен 360 килограмм сухан вăрлăхĕ илсе килнĕ.

     Пурте пĕлетпĕр, пахалăхлă вăрлăх туса илесси, çĕнĕлĕхсене пурнăçа кĕртесси кашни çĕр ĕçченĕн, специалистăн, ертỹçĕн тĕп тивĕçĕ. Çаксене тĕпе хурса тăрăшсан уй-хирсенче пысăк тухăçлă тыр-пул çитĕнĕ тесе калама пулать.