Шкул ачисем хушшинче волейболла выляса районти мала тухмалли ăмăртăва кăçал 8 команда хутшăнчĕ. Вĕсене икĕ ушкăна пайланă. Çĕнĕ Пăвара - площадка хуçисем, Çуткỹлсем, Шăмалаксем, Кĕçĕн Таяпасем, Курнавăшра - вырăнти волейбол ăстисем, Çирĕклĕ Шăхальсем, Елчĕксем, Аслă Таяпасем вылярĕç. Пĕрремĕш ушкăнра Çĕнĕ Пăва шкулĕнче вĕренекен арçын ачасем виçĕ вăййа та выляса илчĕç, Шăмалаксем иккĕшĕнче çĕнтерчĕç, пĕрне выляса ячĕç. Иккĕмĕш ушкăнра Аслă Таяпа шкулĕнче вĕренекенсем виçĕ тĕл пулура çĕнтерчĕç, Елчĕксем виçĕ вăйăран иккĕшĕнче малта пулчĕç, пĕрне выляса ячĕç. Ушкăнсенче малти икĕ вырăна тухнă командăсем çурма финалти вăйăсенче вылярĕç. Унта Аслă Таяпа шкулĕнче вĕренекенсем Шăмалаксенчен 2:0, Çĕнĕ Пăва çамрăкĕсем Елчĕксенчен - 2:1 шутсемпе выляса илчĕç. Финалта Çĕнĕ Пăва тата Аслă Таяпа шкулĕсенчи волейболистсем тĕл пулчĕç. Çĕнĕ Пăва çамрăкĕсем 2:0 шутпа çĕнтерсе куçса çỹрекен кубока çĕнсе илчĕç. Çĕнтерỹçĕ командăшăн Павел Скирдов, Сергей Кузьмин, Петр Мордвинов, Гена Трофимов, Андрей Емельянов, Веня Мышкин вĕренекенсем вылянине çырса пĕлтерчĕ пирĕн пата Çĕнĕ Пăва шкулĕн- че пĕлỹ пухакан Лариса Кротова ялкор. Виççĕмĕш вырăнта - Шăмалаксем. Вĕсем Елчĕк шкулĕнчи арçын ачасене 2:0 шутпа парăнтарнă.

     Хĕр ачасем волейболла выляса чи вăйлă командăна палăртма Курнавăшри пĕтĕмĕшле пĕлỹ паракан вăтам шкула пуçтарăннă. Финалта Çирĕклĕ Шăхаль тата Курнавăш шкулĕсенче вĕренекенсем тĕл пулнă. Çивĕч кĕрешỹре хăнасем вăйлăрах пулни палăрнă. Иккĕмĕшпе виççĕмĕш вырăнсене площадка хуçисем тата Кĕçĕн Таяпари хĕр ачасем йышăннă.