Поздравление главы Яльчикского муниципального округа Л.В.Левого с Новым годом и Рождеством

Хисеплĕ ентешсем, ырă çыннăмăрсем!

Сире чĕререн çывхарса килекен Çĕнĕ çул тата Раштав уявĕсем ячĕпе саламлатăп!

Кăçалхи çул Раççейри Çемье тата республикăри Экологи культурин çулталăкĕнче округ, республика аталанăвĕшĕн сахал мар ĕç пурнăçларăмăр.

Ял хуçалăхĕ округра тĕп отрасль шутланнă май, çĕр ĕçченĕсен тухăçлă ĕçне палăртмасăр иртеймĕн, кăçал та республикăра чи нумай тĕш-тырă пухса илме пултартăмăр.

2024-мĕш çулта округ территоринче чылай инвестици проектне пурнăçласа ĕçе кĕртме май килчĕ.

Наци проекчĕсемпе килĕшÿллĕн ял инфраструктурине çĕнетес, унта пурăнакансен пурнăç условийĕсене лайăхлатас тĕллевпе малалла ĕçлесе пыратпăр. Çавна май кăçал та çулсене йĕркене кĕртессипе, социаллă объектсене юсаса çĕнетессипе тимлерĕмĕр.
Кунсăр пуçне халăх пуçарăвне тĕпе хурса кашни ялта тенĕ пекех сахал мар ырă улшăнусем пулса пыраççĕ: хытарнă çулсем сарăнаççĕ, шыв пăрăхĕсем çĕнелеççĕ, масар пÿрчĕсене юсас тата территорисене тирпейлес ĕç те анлă сарăлнă.

2025-мĕш çул Çĕнтерÿ тата патриотлăх ячĕпе иртĕ. Аттелĕхĕн Аслă вăрçинче совет халăхĕ çĕнтерÿ тунăранпа 80 çул çитет. Пирĕн пуласлăхшăн, тĕнчери тăнăçлăхшăн пуçĕсене хунă паттăрсем те пирĕн асран нихăçан та тухмĕç.

Паянхи кун ятарлă çар операцинче çĕршыв интересĕсене пирĕн харсăр та патвар офицерсемпе салтаксем хÿтĕлеççĕ. Раççей халăхĕ, вăл шутра пирĕн ентешсем те пĕр чăмăра пĕрлешсе Аслă вăрçă вăхăтĕнчи пекех хăюлăхпа паттăрлăх кăтăртаççĕ.

Округ халăхĕ çĕнтерĕве çывхартассишĕн куллен хăйĕн тÿпине хывать. Гуманитари пулăшăвĕ паракан кашни çынна чĕререн тав сăмахĕ калатăп. Фронтпа тыл пĕр чăмăрта пулса, Аслă Çĕнтерÿ çулĕнче тепĕр Çĕнтерĕве те кĕтсе илĕпер.

Çĕнĕ çултан пурте ыррине çеç кĕтетпĕр. Вăл пирĕн округа, кашни яла ырă улшăнусем, кашни çемьене килĕшÿ, тăнăçлăх илсе килтĕр.

Уявсем ячĕпе саламласа пурне те çирĕп сывлӑх, çĕнĕ çитĕнÿсем, телей сунатăп.

Елчĕк муниципаллă округĕн пуçлăхĕ                  Л.В.Левый.