Июнĕн 24-мĕшĕнче Чăваш Республикин Тĕп суйлав комиссийĕ Чăваш Ен Пуçлăхĕн суйлавне хутшăнма кăмăл тăвакан пĕрремĕш кандидатран – Олег Николаевран документсене йышăннă.

Сăмах май, суйлава хутшăнма хăйĕн кандидатурине хăй тăратнă Олег Николаевăн малашне тата суйлавçăсем ырласа алă пуснă хутсене пуçтармалла. ЧР Тĕп суйлав комиссийĕн председателĕ Александр Цветков пĕлтернĕ тăрăх, 4,5 пин ытла çынна алă пустармалла. Кăçалтан пуçласа ку ĕçе дистанци мелĕпе те, Патшалăх пулăшу ĕçĕсен порталĕ урлă, пурнăçлама юрать. Çапла майпа кандидат хутсен 25 процентне пухма пултарать. Çавăн пекех тĕрлĕ шайри депутатсен те хăйсен шухăшне пĕлтермелле.